ኣብ ወረዳ እምባሰነይቲ፤ዝተሃነፀ ሓወልቲ!

28 ለካቲት 2017 ዓ.ም ጉዕዞና ካብ ከተማ መቐለ ንኣንፈት ሰሜን ገይርና ውቅሮ ክልተ ኣውላዕሎ ሓሊፍና ካብ ከተማ ፍረወይኒ ንኣንፈት ምዕራብ ተዓፂፍና ንከተማ ሓውዜን ኣቲና 35 ኪ.ሜ ምስተጉዓዝና ከተማ ነበለት ኣቲና።

ካብ ከተማ ሓውዜን ጀሚሩ ክሳብ ነበለት ተነፂፉ ህንፀቱ ዝጀመረ መንገዲ ኣስፋልት ከይዲ ህንፀቱ ብዘይምዝዛሙ ጉዕዞና ምችው ከይኸውን ኣኽኢልዎ። ንሕና ሓደ ግዘ በቲ መንገዲ ሓሊፍና ከምዚ ዝፀገመና ብተደጋጋሚ ዝሓልፉ ነበርቲ እቲ ከባቢ ከመይ ይፅግሞም ከምዘሎ ናብ ዓይኒ ህሊናይ መፂኡ ተራእዩኒ። እዚ መንገዲ እዚ ንክዛዘም ውሱን ስራሕ ተሪፍዎ ስለዘሎ ተረባሪብካ ምውዳእ የድሊ።

እቲ ዶሮና ዝፈጠረልና ዘይምችው ኩነታት እናስተባሃልና ኣማሲና ናብ ከተማ ነበለት እንትንኣትው ኣብ ወሰን ፅርግያ ነበለት ሓደ ንዓይንና ዝማረኸና ህንፃ ረኺብና። ነበለት ብሓደ ዓብይ ህንፃ ማዕሪጋ ረኺብናያ። እዚ ምዕሩግ ህንፃ ናይ ትካልና ደደቢት ማይክሮፋይናንስ ምዃኑ ቀሪብና ኣረጋጊፅናዮ።

ደደቢት ማይክሮፋይናንስ ኣብ ዝሓለፉ 31 ዓመታት ጎና ጎኒ ስራሕቲ ዕቋርን ልቓሕን ንህንፀት ኣብያተ ዕዮ ፍሉይ ትኹረት ብምሃብ ኣብ ዝተፈላለዩ ዞባታት፣ ወረዳታትን ከተማታትን ትግራይ በቶም ስራሕቲ ህንፃ ኣቢሎም ዕድል ስራሕ ንኽፍጠር፣ ቁጠባዊ ምንቅስቓስ ክነቓቓሕን ከተማነት ክፍጠርን ናይ ባዕላ ኣበርክቶ እናገበረት መፂኣ። ንትካልናን ንካልኦት መንግስታውን ዘይመንግስታውን ኣብያተ ዕዮ መስርሒ ዝውዕሉ ካብ በዓል ሓደ ክሳብ ሓሙሽተ ደብሪ 39 ህንፃታት ኣብ ትግራይ ኣብ ኣዲስ ኣበባ ድማ 10 ኮንደምንየም ክትገዝእ ክኢላ እያ።

እዚ ብልዕሊ 42 ሚልዮን ብር ኣብ ከተማ ነበለት ዝተሃነፀ በዓል 3 ደብሪ ህንፃ ድማ ኣካል እዚ እዩ። እዚ ህንፃ እዚ ኣብ 2012 ዓ.ም ብኣስታት 17 ሚልዮን ብር ምስ ሞላ ኣፅበሃ ተቛራፂ ስራሕቲ ህንፃ ውዕሊ ተኣሲሩ ናብ ስራሕ ኣትዩ ዝነበረ እንትኾን ማሕበረሰብ ነበለት ግና እቲ ንኽህነፅ ዝተትሓዘ በዓል 2 ደብሪ ተመሓይሹ ናብ በዓል 3 ደብሪ ዓብዩ ንኽህነፅ ብዘልዐልዎ ሕቶ መሰረት እቲ ዝነበረ ዲዛይን ተመሓይሹ ናብ በዓል 3 ደብሪ ህንፃ ዓብዩ ኣብ ህንፀት ፀኒሑ።

ኣብ ሃይሃይታ ስራሕ ዝፀነሐ እዚ ህንፃ ኣብ ክልልና ብዘጋጠመ ኲናት ህንፀቱ ተቋሪፁ። ኣፍቲ ህንፃ ዝነበሩ መሳርሕታት ተዘሪፎም። ድሕሪ ውዕሊ ፕሪቶርያ ከም ብሓዱሽ በቲ ናይ ሕዚ ናይ ህንፀት መሳርሕታት ዋጋ መሰረት መመሓየሺ ውዕሊ ብምግባር ልዕሊ 42 ሚልዮን ብር ወፃኢ ብምግባር እቲ ህንፃ ክዛዘም ብሰብ ሞያን ኣመራርሓ ትካልን ዓብይ ውሳነን ምርብራብን ተሳሊጡ እዩ።

በዚ መሰረት ንመስርሒ እቲ ህንፃ ብምምሕዳር እታ ከተማ ብዝተውሃበ 1,600 ካ.ሜ እቲ ህንፃ ኣብ 400 ካሜ ቦታ ክዓርፍ ብምግባር ናይ መኪና መዕረፊ ቦታ ሓዊሱ 2 ዓበይቲ ንስራሕቲ ባንኪ ዝውዕሉ ክፍልታት፣ 2 ዓብይን ማእኸለዋይን ኣደራሻት ሓዊሱ 29 ክፍልታት ዝሓዘ ዘበናዊ ህንፃ እዩ።

ነዚ ህንፃ ተዘዋዊሮም ዝተዓዘቡ ነበርቲ ወረዳ እምባሰነይቲ ንደደቢት ብሃይማኖታዊ ቅኔ፣ ግጥምን ጣቅዒትን ኣወዲሰምዋ። ደደቢት ዓንዲ ሑቐ እምባሰነይትን ሰረት ብሩህ መፃኢ ህዝባን ምዃና ካብ ልቦም ገሊፀምዋ።

ብሓፈሻ ኣብ ከተማ ነበለት ኣብ ዝነበረና ናይ 2 መዓልቲ ትዕዝብተይ ነበርቲ እቲ ከባቢ ኣብ ደደቢት ማይክሮፋይናንስ ዝለዓለ እምነትን ፍትወትን አለዎም። መናእሰይ፣ ዓበይቲ፣ መራሕቲ ሃይማኖት ብሓፈሻ ነበርቲ እታ ከተማ ምዝዛም እቲ ህንፃ ዝፈጠረሎም ስምዒት ዝለዓለ ምዃኑ ካብ ፍሽኽተኦምን ልሳኖምን ትዕዘብ። ኣብ ከይዲ ህንፀት እቲ ህንፃ ድማ ዝብላዕን ዝስተን እናሓዙ ብምምፃእ ሓቦ እናስነቑ ክሳብ ዝዛዘም ደገፍ እናኾኑ ከምዝመፁ እቲ ህንፃ ዝሰርሕዎ ኮንትራክተር ሞላ ኣፅበሃ ግደ ነበርቲ መሰረት ገይሮም ኣዋጊዖምና እዮም።

ነቲ ዝተዛዘመ ህንፃ ንምስራሕ ተኾናቲሩ ናብ ፍፃመ ዘብፀሐ ኮንትራክተር ሞላ ኣፅበሃ ኣፍቲ ከባቢ ፍሉይ ሽምን ፍቅሪ ህዝቢ ኣሕዲሩ። ህዝቢ ፈራዳይን ተዓዛባይን እዩ’ሞ እቲ ህንፃ ንክስራሕ እቲ ኲናት ዝፈጠሮ ፀገም ሓዊሱ ዝተፈላለዩ ፀገማት እዃ እነተጓነፉ ነዞም ኩሎም ፀገማት ተፃዊሩ ብውፍይነት እቲ ህንፃ ንክዛዘም ብዝገበሮ ኣበርክቶን ካልኦት ንማሕበረሰብ ዝጠቕሙ ስራሕቲ ብምስርሑ ኣብ ልቢ እቲ ማሕበረሰብ ክኣቱ ክኢሉ። ልምዓታዊ ኮንትራክተር ምዃኑ ብህዝቢ እቲ ከባቢ ብምምሕዳር እታ ከተማን ኣመራርሓ ትካልናን ተመስኪርሉ።

ደደቢት ኣብ ወረዳ እምባሰነይቲ ዓብይ ሓወልቲ ሰሪታ ናብ ፍፃመ ኣብፂሓ። እቲ ካብ ህዝቢ ብዕቋርን ልቓሕን ዝንቀሳቐስ ቅርሺ ኣብ ባዕሉ ኣፍቲ ህዝቢ ፈሰስ ገይራቶ ኣላ። ነዚ ድማ እዩ ደደቢት ህዝባዊት ትካል ትበሃል። እቲ ተሰሪሑ ዘሎ ዓብይ ህንፃ ናይ ህዝቢ እዩሞ ባዕሉ እቲ ህዝቢ ከምዝከናኸኖ ሰብ ምሉእ ተስፋ ኢና። ሰላም!

ደደቢት ሰረት ብሩህ መፃኢ!